Wani farmakin haɗin gwiwa da sojojin Najeriya da rundunar sojin Amurka ta AFRICOM suka gudanar ya hallaka ‘yan ta’addan ISWAP guda ashirin da ɗaya a jihar Borno.
Rahotanni sun nuna cewa farmakin ya faru ne a ranar ashirin da uku ga watan Mayu a yankin Arege da ke ƙaramar hukumar Kukawa, bayan samun sahihan bayanan sirri da suka tabbatar da cewa ‘yan ta’addan na amfani da wurin a matsayin sansani.
Majiyoyin tsaro sun bayyana cewa an gudanar da aikin ne ta hanyar amfani da binciken sirri da leƙen asiri (ISR), wanda ya tabbatar da motsin ‘yan ISWAP a yankin Kogin Chadi, inda suke shirya hare-hare kan al’umma.
Farmakin ya yi sanadin hallaka mayakan ISWAP guda ashirin da ɗaya tare da tarwatsa sansaninsu, lamarin da jami’an tsaro suka ce zai rage ƙarfin kungiyar a yankin Arewa maso Gabas.
Haka kuma, an bayyana cewa wannan aiki na daga cikin ci gaba da haɗin gwiwar Najeriya da ƙasashen waje wajen yaƙi da ta’addanci da kuma lalata mafakar ‘yan bindiga a yankin.
Jami’an tsaro sun ce farmakin ya nuna yadda ake ƙara samun nasara a yaƙin da ake yi da ta’addanci a yankin Tafkin Chadi, inda kungiyoyin masu tsattsauran ra’ayi ke ƙoƙarin sake haɗuwa domin kai hare-hare.
Najeriya da Amurka Sun Hallaka Mayaƙan ISWAP 19 a Borno Ta Hanyar Amfani Da Jiragen Yaki
