Shugaban jam’iyyar African Democratic Congress (ADC), David Mark, ya bayyana cewa Najeriya na fuskantar barazanar komawa tsarin jam’iyya ɗaya, inda ya zargi jam’iyyar APC da raunana jam’iyyun adawa da kuma cibiyoyin dimokiraɗiyya a ƙasar.
Mark ya yi wannan jawabi ne a taron ‘yan adawa na ƙasa da aka gudanar a Ibadan, inda ya ce wasu abubuwan da ke faruwa a siyasa na nufin takaita ‘yancin ‘yan Najeriya na zaɓen shugabanni cikin ‘yanci.
Ya kuma ce jam’iyyun adawa sun fuskanci matsin lamba a ‘yan shekarun nan, abin da a cewarsa zai iya lalata daidaiton dimokiraɗiyya idan ba a dauki mataki ba.
Haka kuma, ya nuna damuwa kan yadda amincewar jama’a ga hukumar zaɓe ta INEC ke raguwa, yana mai danganta hakan da rashin gaskiya da ake zargi.
David Mark ya yi kira ga ‘yan adawa da su haɗa kai su guji rarrabuwar kai, yana mai cewa babu jam’iyya guda da za ta iya kayar da tsarin siyasar da ya kafu sosai ba tare da haɗin gwiwa ba.
Ya jaddada cewa dole ne ‘yan adawa su fifita muradun ƙasa sama da na kashin kai domin kare dimokiraɗiyya da tabbatar da sahihin zaɓe.
David Mark Ya Gargaɗi Kan Barazanar Tsarin Jam’iyya Ɗaya A Najeriya
