Fitaccen attajirin duniya kuma shugaban kamfanin Tesla, Elon Musk, ya jawo muhawara a shafukan sada zumunta bayan ya bayyana cewa dukiya ba ta tabbatar da samun farin ciki.
Musk ya yi wannan furuci ne a ranar Alhamis ta cikin wani sako da ya wallafa a shafinsa na X.
Zuwa lokacin hada wannan rahoto, sakon ya samu sama da miliyan 51 na masu kallo, kusan sake wallafawa 56,000 tare da dubban martani daga masu amfani da shafin.
Ra’ayoyi sun kasu kashi biyu. Wasu sun amince cewa dukiya ba ta kare mutum daga matsalolin zuciya ko na rayuwa. Sauran kuma sun ce kudi na inganta walwala da bude damar more rayuwa.
Musk bai yi karin bayani ko fassara kan kalamansa ba.
A baya, ya taba magana kan nauyin jagoranci, matsin lambar da jama’a ke dora masa da kuma kalubalen tafiyar da manyan kamfanoni da dama a duniya.
Bayanai daga Bloomberg Billionaires Index sun nuna cewa Musk ya zama mutum na farko da dukiyarsa ta kai dala biliyan 638 a ranar 16 ga Disamba, 2025. Haka kuma dukiyarsa ta karu da kashi 42.7 cikin dari cikin shekara guda daga Disamba 2024.
Baya ga Tesla, Musk na jagorantar SpaceX tare da wasu kamfanoni, kuma yana ci gaba da zama a sahun gaba a tattaunawa kan fasaha, kasuwanci da siyasar Amurka.
Sabon furucin nasa ya sake mayar da hankali kan muhawara game da dukiya, gamsuwar rai da iyakar abin da kudi za su iya bayarwa a rayuwar dan Adam.
Arziki Ba Ya Siyan Farin Ciki — Elon Musk
