’Ya’yan tsohon Mataimakin Gwamnan Jihar Bauchi, Sanata Baba Tela, biyu sun rasu a wani mummunan hatsarin mota da ya faru a hanyar Bauchi zuwa Azare.
Rahotanni sun ce Mustapha da Ummi sun rasu ne a hatsarin da ya auku ranar Asabar, yayin da wasu da ke cikin motar suka jikkata, kuma an kai su asibiti domin samun kulawa.
Likitoci sun tabbatar da rasuwar mutanen biyu, sannan an gudanar da jana’izarsu a Fadar Sarkin Bauchi tare da halartar jama’a da dama.
Gwamnan Jihar Bauchi, Sanata Bala Abdulkadir Mohammed, ya bayyana alhininsa kan lamarin, inda ya ce rasuwar babban rashi ne ga iyalan Sanata Baba Tela da al’ummar jihar baki ɗaya.
Ya kuma yi addu’ar Allah Ya jiƙansu da rahama tare da bai wa iyalansu haƙurin jure wannan rashi.
Ƴa’yan Tsohon Mataimakin Gwamnan Bauchi Sun Rasu A Hatsarin Mota
