Rundunar ‘yan sandan Nijeriya ta gayyaci shugaban ƙungiyar ƙwadago ta ƙasar (NLC), Joe Ajaero zuwa ofishinta a Abuja.
Rundunar ta gayyace shi ne dai saboda amsa tambayoyi game da zargin ɗaukar nauyin ta’addanci da cin amanar ƙasa da laifukan intanet.
Rundunar ta bayyana haka ne a wata takarda da ta aike wa Mr Ajaero ranar Litinin kamar yadda ƙungiyar NLC ta bayyana a shafukanta na intanet.
‘Yan sandan sun umarci shugaban ƙungiyar ƙwadagon ya hallara a ofishinsu da ke bincike kan bayanan sirri ranar Talata a Abuja domin amsa tambayoyi, suna masu gargaɗin cewa za a bayar da sammacin kama shi idan ya ƙi bin umarninsu.
