Dakarun Sojojin Najeriya sun yi nasarar halaka ‘yan bindiga shida da ke addabar mazauna karamar hukumar Birnin-Gwari ta jihar Kaduna.
Mukaddashin daraktan hulda da jama’a na rundunar soji ta daya, Laftanar Kanar Musa Yahaya, ya ce ‘yan bindigar sun haɗu da ajalin nasu ne a ranar Alhamis lokacin da sojojin da ke aiki da sahihan bayanan sirri suka kai wani samame a kauyukansu a Sabon Birnin, Dogon Dawa, Saulwa, Maidaro- Ngede Allah da Kidenda duk a karamar hukumar Birnin-Gwari.
Ya bayyana cewa sojojin sun taɓo ‘yan ta’addan inda nan take suka yi artabu da su har suka kashe shida daga cikinsu.
Sojojin, a cewar kakakin rundunar, sun kuma kwato bindigogin AK-47 guda biyu, da gidan albirushin AK-47 guda hudu, harsashi guda goma sha hudu na 7.62mm, rigunan ‘yan fashi guda arba’in, da kuma babura tara.
