Shettima: Tinubu Ya Ceto Najeriya Daga Durkushewar Tattalin Arziki

Mataimakin Shugaban Kasa, Kashim Shettima, ya ce matakan gyaran tattalin arziki da gwamnatin Shugaba Bola Tinubu ta dauka sun hana Najeriya fadawa cikin mummunan yanayin tattalin arziki.

Shettima ya bayyana hakan ne a ranar Asabar bayan ganawarsa da Tinubu a Legas, inda ya kare matakan da gwamnatin ta dauka tun bayan hawanta mulki a shekarar 2023.

Ya ce ajiyar kudaden kasar waje ta Najeriya ta kasance kasa da dala biliyan 3.9 lokacin da gwamnatin Tinubu ta fara aiki, yana mai cewa hakan ya nuna tsananin halin da tattalin arzikin kasar ke ciki a lokacin.

Shettima ya ce cire tallafin man fetur da kuma sauya tsarin hada-hadar kudaden kasashen waje na daga cikin manyan matakan da Tinubu ya dauka domin tunkarar matsalar tattalin arzikin kasar.

Ya kuma amince cewa ’yan Najeriya na fuskantar wahalhalun tattalin arziki, amma ya ce gwamnatin tarayya na daukar matakan rage radadin da jama’a ke fuskanta.

A cewarsa, gwamnati za ta kaddamar da shirin e-logistics a Arewa maso Yamma, yayin da za a samar da kekunan hawa masu amfani da wutar lantarki 10,600 a Arewa maso Gabas, tare da bas-bas 300 da motocin haya masu amfani da wutar lantarki domin rage matsin farashin sufuri.

Shettima ya kuma ce gwamnatin Tinubu na sane da halin da talakawa ke ciki, yana mai cewa za a ci gaba da samar da shirye-shiryen da za su taimaka wajen rage musu radadin matsin tattalin arziki.