Sauye-sauyen sun hada da mayar da runduna ta musamman mai yaki da fashi da makami, SARS karkashin kwamishinonin yan sanda na jihohi.
Ya kuma rusa duk sassan da ke gudanar da bincike kamar Kwamitin Jami’ai masu bincike na musamman.
Haka kuma, ya sanar da cewa zai yi gyaran fuska a yadda rundunar ke tattara bayanan sirri da yin bincike da kuma ayyuka na musamman na rassan rundunar kan yaki da ta’addanci da sashen da ke bayar da kariya na musamman.
Wannan ne dai taronsa na farko da kwamishinonin ‘yan sanda da sauran manya a rundunar.
Taron na sirri zai duba matakan tsaro da rundunar za ta dauka a lokacin zabe mai zuwa. A makon jiya ne dai Shugaban Najeriya Muhammadu Buhari ya nada sabon babban sufeton riko na ‘yan sandan kasar.
Ya maye gurbin Ibrahim Idris, wanda ya sauka daga kan mukaminsa bayan ya kai shekara 60 da haihuwa kamar yadda doka ta tanada.