Shugaban Rasha Vladimir Putin ya bayyana cewa ƙungiyar tsaron NATO ta kasa cimma manufarta ta kayar da Rasha ta hanyar rikicin Ukraine.
Putin ya yi wannan bayani ne a Kremlin yayin wata ganawa da sojojin da ke shiga abin da Moscow ke kira aikin soja na musamman a Ukraine, a wani bangare na bukukuwan Ranar Rasha.
Shugaban na Rasha ya zargi NATO da ƙasashen Yamma da haddasa rikicin, yana mai cewa Rasha ba ita ce ta fara yaƙin ba. Ya ce ƙasarsa ta yi ƙoƙarin samar da mafita ta hanyar tattaunawa na tsawon shekaru kafin rikicin ya rikide zuwa yaƙi.
Putin ya kuma yi ikirarin cewa wasu matakan da NATO da ƙasashen Yamma suka ɗauka ne suka sa Rasha ta shiga rikicin domin kare muradunta.
Haka kuma ya ce Rasha har yanzu a shirye take ta shiga tattaunawar zaman lafiya, amma ya jaddada cewa duk wata yarjejeniya dole ne ta yi la’akari da muradun ƙasar na dogon lokaci.
Kalaman Putin na zuwa ne yayin da ake ci gaba da ƙoƙarin diflomasiyya domin kawo ƙarshen rikicin Rasha da Ukraine.
Putin Ya Ce NATO Ta Gaza Kayar Da Rasha Ta Hanyar Yaƙin Ukraine
