Liverpool ta barar da damar dare wa teburin Premier bayan Everton ta rike ta babu ci a Goodison Park.
Liverpool za ta ci gaba da zama matsayi na biyu bayan ta gaza doke Everton inda suka tashi wasa 0-0 a ranar Lahadi.
Tazarar maki daya ne Manchester City da ke saman teburin gasar ta ba Liverpool.
City ta doke Bournemouth ne 1-0 a ranar Asabar, inda take da maki 71, yayin da Liverpool ke da maki 70.
Yanzu hamayya kan wanda zai lashe kofin Premier ta dawo ne tsakanin Manchester City da Liverpool yayin da ya rage wasanni tara a kammala gasar.
Chelsea ta doke Fulham
Chelsea ta doke Fulham ne ci 2-1, inda yanzu wasa 18 ke nan da Chelsea ke doke Fulham a gasar Premier.
Gonzalo Higuain ne ya fara ci wa Chelsea kwallo a raga kafin Jorginho ya kara bayan Chambers ya farke kwallon da Higuain ya fara ci.
Fulham ta sha kashi a wasa takwas cikin tara da ta buga, kuma yanzu tazarar maki 10 ya raba da ta kasan tebur yayin da ya rage wasa tara a karkare Premier.