Mahukuntan Kwara State Polytechnic da ke Ilorin sun dakatar da wani malami daga aiki bayan wani bidiyo ya nuna yana bulala wa wasu ɗaliban IJMB da suka makara zuwa jarrabawa.
Hukumar makarantar ta sanar da hakan ne ta cikin wata sanarwa da mai magana da yawunta, Hajiya Halimat Garba, ta fitar a ranar Litinin.
Makarantar ta bayyana cewa ɗaliban da aka gani a bidiyon ba ɗaliban polytechnic ɗin ba ne, sai dai masu rubuta jarabawar IJMB.
Sanarwar ta ce an dakatar da malamin ne har sai an kammala bincike kan lamarin.
Mahukuntan makarantar sun jaddada cewa ba sa amincewa da amfani da tashin hankali ko hukuncin jiki wajen ladabtar da ɗalibai, tare da cewa za su ɗauki matakan hana sake faruwar irin hakan nan gaba.
Kwara Poly Ta Dakatar Da Malami Kan Zargin Bulala Wa Ɗaliban IJMB
