Hakkin mallakar hoto
Getty Images
An bayyana dan kwallon Arsenal, Pierre-Emerick Aubameyang a matsayin dan wasan da babu kamaras wajen taka rawar gani a gasar Premier a watan Satumba.
Aubameyang, mai shekara 30 ya ci kwallo biyar a watan jiya a karawa biyar da ya yi wa Gunners har da wadda ya ci a bugun tazara a fafatawa da Aston Villa.
An kuma bayyana kocin Liverpool, Jurgen Kloop karo na biyu a jere a matakin wanda ya fi kowa yin bajinta a gasar ta Premier a dai watan na Satumba.
Liverpool wadda har yanzu ba a doke ta ba a wasannin Premier bana ta yi nasara a kan Newcastle United da Chelsea da kuma Sheffield United a watan Satumbar.
Kocin dan kasar Jamus ya yi takara da mai horas da Bournemouth, Eddie Howe da na Chelsea, Frank Lampard da kuma Brendan Rodgers mai jan ragamar Leicester City.
Aubameyang ya ci kwallo a karawar da Gunners ta yi 2-2 da Watford shi ne ya farke kwallon da Tottenham ta ci Arsenal da kuma wadda Manchester United ta zura a ragar Arsenal.
Dan wasan tawagar Gabon ya yi takara ne da Trent Alexander-Arnold da Kevin de Bruyne da Son Heung-min da kuma Riyad Mahrez.
