Hakkin mallakar hoto
Getty Images
Real Madrid za ta karbi bakuncin Ajax a wasa na biyu a gasar cin kofin Zakarun Turai ta Champions Leageu da za su fafata a Santiago Bernabeu a ranar Talata.
A wasan farko da suka kara a gasar ranar 13 ga watan Fabrairu, Real ce ta doke Ajax da ci 2-1 a fafatawar da suka yi a Netherlands.
Real ce ta fara cin kwallo ta hannun Karim Benzema daga baya Ajax ta farke ta hannun Hakim Ziyech, daf da za a tashi daga karawar Real ta kara na biyu ta hannun Marco Asensio.
Sai dai kuma kyaftin din Madrid, Sergio Ramos ba zai buga fafatawar ba, sakamakon kar bar katin gargadi da gangan da ya yi, daga baya hukumar kwallon Turai ta ce ta dakatar da shi wasa biyu.
Ramos ya yi wa Kasper Dolberg na Ajax keta a minti na 89, wanda hakan yake nufin an dakatar da shi daga buga wasan gaba.
Dan wasan bayan Spain din ya shaida wa manema labarai cewa “zai yi karya idan ya ce bai nemi hakan da gangan ba”.
Hukumar Uefa ta yi bincike game da batun kuma ta hana shi buga karin wasa guda saboda ya nemi katin gargadi da gangan.
Bayan da Ramos ya karbi katin gargadin, hakan yana nufin ya rage yiwuwar kin buga wani babban wasa da ke gaba.
Sai dai saboda wannan hukunci na hukumar Uefa, idan Real Madrid ta kai matakin wasan gab da na karshe, Ramos ba zai buga wasan ba.
