L
Shugaban kasar Iran, Hassan Rohani, ya caccaki Amurka a game da yadda ta ke hadassa fargaba a duniya kan cutar Coronavirus.
Shugaba Rohani, ya ce Amurka na razana duniya game da batun cutar data bulla a kasar, sannan ta ke ci gaba da yaduwa a wasu kasashen duniya.
‘’ Bai kamata mu kyale Amurka ta hadassa mana wani sabon virus ba, wanda shi ne matsanancin tsoro’’ inji shugaba Rohani.
Rohani, ya kara da cewa, Amurka da kanta tana fama da cutar ta corona, sannan mutane 16,000 suka mutu a can din sakamakon mura, amma bata magana akan batun.
Kalamman na shugaba Rohani, na zuwa ne kwana guda bayan furucin sakataren harkokin wajen Amurka Mike Pompeo, na cewa Iran na boye gaskia akan abunda ya shafi cutar mai shafar numfashi ta Covid-19.
Kawo yanzu dai mutane 19 aka tabbatar da sun mutu sanadin cutar a Iran, sai kuma wasu 139 da suke jinyarta.
Iran dai ta sha alwashin daukar duk matakan da suka dace na murkushe cutar.
