Jakadan Rasha a Amurka Ya Rasu Yana da Shekaru 66

Jakadan Rasha a Amurka, Alexander Darchiev, ya rasu ba zato ba tsammani yana da shekaru 66, bayan shafe shekara guda da rabi kacal a kan mukaminsa.

Ma’aikatar Harkokin Wajen Rasha ce ta sanar da rasuwarsa a ranar Laraba, inda ta bayyana marigayin a matsayin ƙwararren jami’in diflomasiyya, gogaggen shugaba kuma abokin aiki mai kyakkyawar mu’amala.

An naɗa Darchiev a matsayin jakadan Rasha a Amurka a watan Maris na shekarar 2025.

Sai dai ma’aikatar ba ta bayyana musabbabin rasuwarsa ko ƙarin bayanai kan yadda lamarin ya faru ba.

Kafin naɗinsa a Amurka, Darchiev ya taɓa riƙe muƙamin jakadan Rasha a ƙasar Canada daga shekarar 2021 zuwa 2024.

An naɗa shi jakadan Amurka ne a shekarar da ta gabata, jim kaɗan bayan Shugaba Donald Trump ya sake komawa kan karagar mulki, a daidai lokacin da rikicin yaƙin Rasha da Ukraine ke ci gaba da haifar da saɓani tsakanin Moscow da ƙasashen Yamma.

Darchiev ƙwararre ne kan alaƙar diflomasiyya tsakanin Rasha da Amurka. Ya kuma taɓa jagorantar sashen kula da harkokin Arewacin Amurka na Ma’aikatar Harkokin Wajen Rasha daga shekarar 2014 zuwa 2020.

A shekarar 2022, lokacin da Rasha ta ƙaddamar da yaƙi a Ukraine, Darchiev ya bayyana matakin a matsayin “matakin da ya zama dole”.