Sojoji Sun Kwance Bama-Bamai Da Aka Dasa A Hanyar Zamfara

Dakarun sojojin Najeriya na rundunar Operation Fansan Yamma sun kwance bama-bamai da ’yan ta’adda suka dasa a kan hanyar Mamagmi-Hannutara-Dansadau, da ke Karamar Hukumar Maru ta Jihar Zamfara.

A cewar sanarwar rundunar, an gano bama-baman ne bayan samun bayanan sirri kan barazanar da ke fuskantar matafiya masu amfani da hanyar.

Sanarwar ta ce dakarun Sector 2 sun je wurin tare da gudanar da bincike, inda suka gano bama-baman a wurare biyu daban-daban.

Daga bisani, kwararru kan abubuwan fashewa sun samu nasarar lalata daya daga cikin bama-baman tare da kwance dayan, ba tare da wata matsala ba.

Rundunar ta ce ta tsananta sintiri a kan hanyar domin kare rayuka da dukiyoyin jama’a da kuma dakile yunkurin sake dasa bama-bamai.

Ta kuma bukaci jama’a da su kasance masu lura da duk wani abu da ake zargi, tare da gaggauta sanar da jami’an tsaro.