Kwalejin Sokoto Ta Karyata Sace Dalibanta 18

Hukumar gudanarwar Gamji College of Health Technology da ke Jihar Sokoto ta karyata rahoton da ke cewa an sace dalibanta 18 a kan hanyar zuwa Jihar Oyo.

A cikin wata sanarwa da magatakardar kwalejin, Bello Abdulrahman, ya fitar ranar Litinin, hukumar ta ce rahoton karya ne kuma ba ya nuna ainihin abin da ya faru.

Hukumar ta ce babu wani dalibi daga cikin daliban makarantar da aka yi garkuwa da shi, sannan babu wani lamari makamancin haka da ya shafi daliban makarantar.

Wannan bayani ya biyo bayan wani rahoto da Sahara Reporters ta wallafa a ranar 5 ga Oktoba, 2026, wanda ya yi zargin cewa an sace dalibai 18 yayin tafiyarsu zuwa Oyo, tare da kashe direban motar da suke ciki.

Sai dai kwalejin ta tabbatar da cewa dukkan dalibanta suna cikin koshin lafiya kuma sun isa wuraren da suka nufa.

Hukumar ta bukaci iyaye, masu kula da dalibai da sauran jama’a da su yi watsi da rahoton tare da kauce wa ci gaba da yada shi.

Ta kuma shawarci jama’a da ke neman bayanai kan makarantar da su rika amfani da hanyoyin sadarwa na hukuma domin samun sahihan bayanai.