Ƴan Majalisar Zamfara 8 Sun Yi Murabus Daga APC Kan Rashin Tsaro, Rashin Albashi

’Yan majalisar dokokin Jihar Zamfara guda takwas sun sanar da ficewarsu daga jam’iyyar APC, bisa zargin tabarbarewar tsaro, rashin adalci da kuma rashin biyan albashi da alawus-alawus.

’Yan majalisar sun ce sun yanke shawarar barin jam’iyyar ne saboda abin da suka bayyana a matsayin gazawar APC da gwamnatin jihar wajen magance matsalolin tsaro, musamman a yankunan karkara.

’Yan majalisar da suka yi murabus sun hada da Aliyu Kagara mai wakiltar Talata Mafara ta Kudu; Ibrahim Bakura mai wakiltar Bakura; Faruk Dosara mai wakiltar Maradun I; da Bashir Masama mai wakiltar Bukkuyum ta Arewa.

Sauran su ne Muktaru Kaura mai wakiltar Kaura ta Arewa; Nasiru Abdullahi mai wakiltar Maru ta Arewa; Bashar Bello mai wakiltar Bungudu ta Yamma; da Bashar Aliyu mai wakiltar Gummi I.

Kagara ya ce ’yan majalisar sun shafe watanni 32 ba tare da samun albashi, alawus-alawus da sauran hakkokinsu ba. Ya kuma zargi gwamnatin Gwamna Dauda Lawal da rashin ba da isasshen kulawa ga matsalar tsaro a yankunan karkara.

Ya ce, a matsayinsu na wakilan al’umma, sun damu da yadda matsalar tsaro ke kara kamari, musamman a yankunan karkara da wadanda suka zabe su ke fuskantar barazana.

Sai dai Sakataren Yada Labarai na APC a Zamfara, Ibrahim Birnin-Magaji, ya ce jam’iyyar ba ta karbi takardun murabus din ’yan majalisar a hukumance ba.

Ya ce APC ta ga takardun ne a shafukan sada zumunta, kuma tana jiran a aiko mata da su ta hanyoyin jam’iyyar daga mazabu da kananan hukumomin da ’yan majalisar suka fito.

An kuma ruwaito cewa APC ta dakatar da ’yan majalisar kafin murabus dinsu, bisa zargin yunkurin tsige Kakakin Majalisar Dokokin jihar kusan shekara guda da ta gabata.