Abba Ya Bukaci Arewa Ta Bar Tinubu Ya Kammala Wa’adinsa Kafin Ta Nemi Mulki A 2031

Gwamnan Kano, Abba Kabir Yusuf, ya bukaci al’ummar Najeriya, musamman mazauna Arewa, da su goyi bayan Shugaban Ƙasa Bola Tinubu domin ya kammala wa’adinsa na biyu kafin a mayar da shugabancin ƙasar Arewa a shekarar 2031.

Gwamnan ya ce ya kamata a ci gaba da tsarin karɓa-karɓar shugabancin Najeriya tsakanin Arewa da Kudu, ta yadda kowane yanki zai samu damar samar da shugaban ƙasa na wa’adi biyu a jere.

Kakakin gwamnan, Sanusi Bature, ya bayyana hakan a wata sanarwa da ya fitar ranar Lahadi, inda ya ce Abba ya yi wannan jawabi a Fadar Gwamnatin Kano.

Abba ya ce barin kowane yanki ya yi wa’adi biyu a jere zai bai wa shugaban da ke kan mulki isasshen lokaci wajen aiwatar da manyan manufofi, shirye-shirye da ayyukan ci gaba.

Ya kuma yi kira ga ’yan siyasa, musamman na Arewa, da su yi hakuri su bar yankin da ke da mulki ya kammala wa’adinsa.

“Shugabancin ƙasar zai koma Arewa bayan Kudu ta kammala wa’adinta biyu a 2031,” in ji shi.

A cewarsa, tsarin karɓa-karɓar mulki tsakanin Arewa da Kudu zai taimaka wajen ƙarfafa adalci, haɗin kan ƙasa da amincewa da juna, tare da bai wa ’yan Najeriya daga sassa daban-daban damar jin cewa suna da matsayi da dama a cikin ƙasar.