Atiku ya bada miliyan 20 ga iyalan mutane 37 da su ka mutu a Minna

Tsohon mataimakin shugaban kasa kuma ɗan takarar shugaban ƙasa na jam’iyyar African Democratic Congress (ADC), Atiku Abubakar, ya bayar da tallafin Naira miliyan 20 ga iyalan mutanen  da ake zargi da hakar ma’adinai ba bisa ka’ida ba, waɗanda suka mutu a hannun hukumar  tsaro ta NSCDC a ofishinsu  dake Minna babban birnin jihar Neja.

Mutanen da suka mutu sun kasance cikin waɗanda aka kama a lokacin samamen da jami’an Civil Defence su ka kai a ranar 15 da 16 ga watan Satumba a wurin haƙar ma’adanai ba bisa ka’ida ba dake  kusa da rukunin gidaje na Lt Gen Mohammed Inuwa Wushishi da ke babban birnin jihar.

Bayan faruwar lamarin, gwamnatin tarayya ta dakatar da kwamandan NSCDC na jihar Neja tare da umartar a gudanar da cikakken bincike kan yadda mutuwar ta faru.

Atiku ya bayar da tallafin ne a  lokacin da ya ziyarci Minna, inda ya gana da iyalan da abin ya shafa da kuma waɗanda suka tsira daga lamarin, sannan ya kai gaisuwar ta’aziyya ga Sarkin Minna, Umar Bahago, da tsohon shugaban soja Ibrahim Babangida.

A cikin wata sanarwa da Phrank Shaibu, mai taimaka masa na musamman kan harkokin yada labarai, ya fitar, Atiku ya bayyana mutuwar a matsayin abin bakin ciki da ke nuna raunin matasa ‘yan Najeriya da ke fama da matsin tattalin arziki.

Ya ce ya fi shiga damuwa da labarin da yaji daga ɗaya daga cikin waɗanda suka tsira daga lamarin.

“Labari ne mai ban tsoro da na ji daga ɗaya daga cikin waɗanda suka tsira,” a cewar Atiku

“Ya shaida mana cewa sama da mutum 68 aka cusa su cikin ƙaramin ɗakin tsare masu laifi, inda yanayi ya tsananta har suka fara shan fitsarin juna don samun ruwa.”

Atiku ya ce babu wani ɗan Najeriya da ya kamata a tauye masa mutunci da rayuwa a hannun gwamnati. Ya ƙara da cewa duk da zargin da ake yi musu, suna da hakkin rayuwa cikin mutunci da kariya ta doka.

Ya kuma yi kira da a duba matsalolin tattalin arziki da ke tilasta matasa shiga sana’o’in haɗari da ba su da tsari.