Za Mu Ci Gaba Da Matsa Lamba Wa ’Yan Bindiga, In Ji Gwamnan Sokoto

Gwamnan Jihar Sokoto, Ahmed Aliyu, ya ce gwamnatinsa za ta ci gaba da matsa lamba kan ’yan bindiga har sai an samu zaman lafiya, domin ba da damar mayar da mutanen da suka rasa muhallansu zuwa gidajensu.

Jihar Sokoto na daga cikin jihohin Arewa maso Yammacin Najeriya da hare-haren ’yan bindiga suka addaba, lamarin da ya tilasta wa mutane da dama barin gidajensu.

A cikin wata sanarwa da Sakataren Yaɗa Labaran Gwamnan, Abubakar Bawa, ya fitar, gwamnan ya ce haɗin gwiwar gwamnati da hukumomin tsaro na ci gaba da samun sakamako mai kyau wajen yaƙi da ’yan bindiga a sassan jihar.

Ya ce gwamnatin jihar ta samar da sabbin motoci masu sulke da sauran kayan aiki ga jami’an tsaro, domin ƙarfafa musu gwiwa da inganta ayyukan da suke gudanarwa.