EFCC Tana Neman Tsohon Shugaban Hukumar Fansho Maina Ruwa A Jallo

Hukumar Yaki da Cin Hanci da Rashawa ta Najeriya (EFCC) ta bayyana tsohon shugaban Pension Reform Task Team (PRTT), Abdulrasheed Abdullahi Maina, a matsayin wanda take nema.

EFCC ta bayyana hakan ne a wani sako da ta wallafa a shafinta na X da aka tabbatar, wanda shugaban sashen yada labarai da wayar da kan jama’a na hukumar, Dele Oyewale, ya sanya wa hannu ranar Laraba.

Ana zargin Maina da hannu a wata badakalar kudaden fansho da ta kai biliyoyin naira, lamarin da ya jawo masa shari’a da kuma hukunci a kotu.

A watan Nuwamba 2021, Babbar Kotun Tarayya da ke Abuja ta same shi da laifin halasta kudaden haram da suka shafi sama da Naira biliyan biyu.

EFCC ta gurfanar da Maina a gaban kotu a watan Oktoba 2019, inda aka tuhume shi da laifuka 12, amma ya musanta aikata su.

Bayan samun hukunci, an tsare shi a gidan gyaran hali na Kuje, inda daga bisani aka sake shi bayan ya kammala zaman gidan yari da aka yanke masa.

Sanarwar EFCC ba ta bayyana cikakken dalilin da ya sa ta sake sanya Maina cikin mutanen da take nema ba.