Ƴan Sanda Sun Kwato Harsasai 300 Da Bindigogi Uku A Kaduna

Rundunar ’yan sandan Jihar Kaduna ta ce ta dakile wani yunkurin satar mutane a karamar hukumar Makarfi, tare da kama wasu mutane uku a wasu samame daban-daban da kuma kwato bindigogi kirar gida Najeriya guda uku da harsasai 300.

Kakakin rundunar, DSP Mansir Hassan, ya bayyana hakan a wata sanarwa da ya fitar ranar Laraba.

Ya ce lamarin farko ya faru ne da misalin karfe 1:15 na dare ranar 20 ga Satumba, lokacin da wasu ’yan bindiga suka kai hari kan wani mazaunin Gimi Ward da ke karamar hukumar Makarfi.

Jami’an sashen ’yan sanda na Makarfi, tare da hadin gwiwar ’yan banga, sun mayar da martani bayan samun kiran gaggawa, inda suka yi musayar wuta da maharan.

A cewar rundunar, jami’an sun yi galaba kan maharan, lamarin da ya tilasta musu tserewa zuwa cikin daji.

Daya daga cikin wadanda ake zargin, mai suna Usman Alhaji Dahiru, mai shekaru 20, wanda mazaunin yankin ne, ya samu rauni kuma aka kama shi.