NFIU Ta Gano Yadda ‘Yan Ta’adda Ke Amfani Da Asusun Matattu Da Tallafin Jama’a

Hukumar Leken Asirin Kudi ta Najeriya (NFIU) ta gano sabbin hanyoyin da ake amfani da su wajen tara da karkatar da kudade domin tallafa wa ayyukan ‘yan ta’adda a Najeriya.

A cikin rahoton shekarar 2025 na hukumar, NFIU ta ce masu daukar nauyin ta’addanci na amfani da asusun banki da aka bude da sunayen mata, da kuma lambobin waya da ba su da alaka da ainihin masu asusun.

Hukumar ta kuma gano wata hanyar tara kudade ta yanar gizo, inda wasu masu taimaka wa ‘yan ta’adda daga kasashen waje ke amfani da kafafen sada zumunta wajen neman gudummawa karkashin sunan tallafin jin kai ko ilimi.

Rahoton ya ce ana karbar kananan gudummawa daga mutane da dama, sannan a hada kudaden cikin wani babban asusu kafin a rarraba su zuwa kananan-kudade ta kamfanonin tura kudi da manhajojin aikewa da kudi zuwa ga wasu ‘yan amshin shatan da ke Najeriya.

NFIU ta ce ana amfani da dalibai, kananan ‘yan kasuwa da ‘yan uwa wajen karbar kudaden, wadanda daga bisani ake amfani da su wajen sayen kayayyakin da za su iya taimakawa ayyukan ta’addanci ko kuma a mika su ga masu kula da harkokin kungiyar.

Hukumar ta kuma bayyana cewa wasu masu daukar nauyin ta’addanci na amfani da asusun mata a matsayin madogara, inda maza ke rike da katunan ATM, lambobin sirri da bayanan bankin wayar salula. A wasu lokuta kuma, ana amfani da SIM da aka yi wa rajista da sunayen mutanen da suka rasu domin boye sahihin wanda ke tafiyar da kudaden.

NFIU ta ce wasu kungiyoyin ta’addanci, ciki har da ISWAP, na amfani da kalmomi da lambobi na musamman a bayanan hada-hadar kudi domin boye manufar aika kudaden da kuma kauce wa tsarin gano mu’amaloli masu hadari.

Hukumar ta bukaci hukumomin tsaro da cibiyoyin hada-hadar kudi su kara hada kai wajen gano hanyoyin da masu aikata laifuka ke amfani da su wajen boye kudaden haram.

Wani masani kan tsaro, Chidi Omeje, ya bukaci hukumomin tsaro da na leken asirin kudi su kara mayar da hankali kan bin sawun kudade.


Shi ma wani mai sharhi kan harkokin tsaro, Lawrence Alobi, ya bukaci hukumomin tsaro su kara musayar bayanai tare da bankuna domin dakile amfani da asusun bogi da na wakilai wajen gudanar da haramtattun hada-hadar kudi.