Wani direban aikin kai kaya ya rasa ransa a wani hatsarin mota da ya faru a yankin Alapere da ke jihar Lagos, bayan wata tankar mai ta buge shi.
Rahotanni sun nuna cewa tankar, wadda ba ta ɗauke da mai, na tafiya da sauri ne lokacin da ta bugi direban, lamarin da ya yi sanadin mutuwarsa nan take.
Jami’an Hukumar Kula da Harkokin Tuki ta Jihar Lagos (LASTMA) sun isa wurin da gaggawa domin daidaita al’amura, inda wasu abokan aikin mamacin suka nuna fushi ga direban tankar. Sai dai jami’an sun ceci direban wanda ya samu raunuka, tare da mika shi ga jami’an agajin gaggawa domin kula da lafiyarsa.
‘Yan sanda sun kuma isa wurin domin kwantar da tarzoma, yayin da aka kwashe tankar da babur din da ya lalace zuwa hannun hukuma.
Shugaban LASTMA, Olalekan Bakare-Oki, ya jajanta wa iyalan mamacin, tare da kira ga direbobi musamman na tankoki da su bi dokokin hanya domin kare rayuka. Ana ci gaba da bincike kan musabbabin hatsarin.
Tanka Ta Murƙushe Direban Aikin Kai Kaya Har Lahira A Lagos
