Jami’an ‘yan sanda sun cafke wani matashi mai suna Edward Okorie bisa zargin dukan budurwarsa, Sophy Chika har ta rasu, bayan wata takaddama da ta barke a gidan da suke tare a yankin Ohafia da ke jihar Abia.
Rahotanni sun bayyana cewa marigayiyar ma’aikaciyar jinya ce daga Abam, karamar hukumar Arochukwu, amma tana zaune tare da saurayinta wanda dan asalin karamar hukumar Ohafia ne.
Har yanzu babu cikakken bayani kan abin da ya haddasa rikicin da ya kai ga mutuwar tata.
Mai magana da yawun rundunar ‘yan sandan jihar Abia, DSP Maureen Chinaka, ta tabbatar da faruwar lamarin, inda ta ce jami’in DPO na yankin Ohafia ne ya sanar da ita.
Ta kuma ce an mika shari’ar zuwa sashen binciken manyan laifuka na jihar (SCID) da ke Umuahia domin gudanar da cikakken bincike, inda sakamakon binciken zai bayyana ainihin abin da ya faru.
A wani lamari makamancin haka, rundunar ta kuma fara bincike kan wata mata a Umuahia da ake zargi da kashe mijinta, Mista Chidiebere James, ta hanyar soka masa almakashi, bayan da ta gano wasu sakonni a wayarsa.
Matashi a Najeriya Ya Hallaka Budurwarsa
