Hukumar Federal Road Safety Corps (FRSC) ta ɗauki matakin ladabtarwa mai tsauri inda ta sallami jami’ai 43 daga aiki sakamakon laifukan rashin biyayya da ɗabi’a maras kyau da suka aikata yayin gudanar da aiki.
A cikin sanarwar da hukumar ta fitar, ta ce: “Daga cikin waɗannan jami’an, 31 an sallame su ne saboda rashin biyayya, 5 saboda ɗabi’a maras kyau, sannan 7 saboda aikata laifuka yayin sintiri.”
Shugaban FRSC, Shehu Mohammed, ya bayyana cewa an ɗauki matakin ne domin tabbatar da jami’ai sun bi ƙa’idojin aiki yadda ya dace.
Ya ce: “alamar FRSC alama ce ta ɗabi’a da ɗawainiya, kuma kowane jami’in da ya saba wa ƙa’idojin hukumar zai fuskanci hukunci.”
Shugaban ya ƙara da cewa rashin biyayya babban laifi ne, musamman ga hukuma da aka ɗora wa alhakin kare rayukan al’umma a kan hanyoyi. Ya kuma ce ɗabi’a maras kyau da aikata laifuka yayin sintiri na rage amincewar jama’a tare da saɓa wa ƙa’idojin gaskiya da ladabi na hukumar.
FRSC ta jaddada cewa za ta ci gaba da sa ido kan ayyukan cikin gida, ta ƙarfafa tsarin kulawa, tare da wayar da kan jami’anta kan muhimmancin kyakkyawar ɗabi’a a dukkan sassan hukumar a faɗin ƙasa.
FRSC Ta Sallami Jami’ai 43 Kan Rashin Biyayya Da Ɗabi’a Maras Kyau
