Rundunar ’yan sandan jihar Akwa Ibom ta ce ta ceto wani tsoho mai shekaru 81 daga hannun wata kungiyar da ake zargi da damfara a birnin Uyo da kewaye.
Kakakin rundunar, DSP Timfon John, ya bayyana hakan a wata sanarwa da ya fitar ga manema labarai a Uyo. Ya ce an kama mutane uku da ake zargin su na daga cikin kungiyar a yayin wani samame da aka gudanar ranar Talata.
A cewarsa, kamen ya biyo bayan bayanan sirri da wani dan kasa nagari ya bai wa ’yan sanda, wanda ya ja hankalinsu kan yadda wadanda ake zargin ke amfani da babur mai kafa uku (keke Napep) wajen yaudarar jama’a.
DSP Timfon John ya ce bayan samun sahihan bayanai, jami’an rundunar sun yi gaggawar daukar mataki, inda suka tarwatsa kungiyar tare da kama wadanda ake zargi. Ya kara da cewa sun kwato keken Napep da ake amfani da shi wajen aikata laifin, mai lambar rajista UFG-886-QA.
Kakakin rundunar ya bayyana cewa wadanda aka kama sun amsa laifin, inda suka tabbatar da cewa sun damfari mutane da dama a Uyo da kewaye, tare da kwace musu kudi da wasu kayayyaki.
Rundunar ta ce bincike na ci gaba da gudana domin gano sauran wadanda abin ya shafa, da kuma kamo sauran mambobin kungiyar da har yanzu ke tsere.
Ƴan Sanda Sun Ceto Tsoho Ɗan Shekaru 81 Daga Kungiyar Ƴan Damfara a Najeriya
