Rundunar ƴan sandan jihar Legas ta kama mutane sama da 50 da ake zargin suna da hannu rikicin da ya faru a kasuwar Ile Epo dake jihar.
Rikici ya ɓarke a kasuwar ranar Laraba bayan wani saɓani da aka samu kan wasan cacar Lotto har ta kai ga ɓata gari sun ƙona shaguna da dama da kuma gidajen katako na kwanan mutane.
A cewar wasu majiyoyi wani mutumin arewa ne ya ci maƙudan kuɗi a cacar ta Lotto amma sai masu shagon cacar suka ƙi bashi duka kuɗin da ya ci abin ya haifar da rikici.
An tura tawagar jami’an tsaro ya zuwa kasuwar da safiyar ranar Alhamis.
Mai magana da yawun rundunar ƴan sandan jihar Legas,Benjamin Hundeyin ya ce tuni al’amura suka ci gaba da gudana a kasuwar kamar yadda aka saba.
“Sama da mutane 50 da ake zargi aka kama kawo yanzu a yayin da gidajen katakon da suke kwana aka rushe su domin raba su da kasuwar,” a cewar Hundeyin..
Tuni kwamishinan ƴan sandan jihar, Adegoke Fayoade ya bayar da umarnin gaggauta gurfanar da mutanen da aka kama a gaban kotu.
