Mark Zuckerberg, mamallakin Facebook, ya bayar da sanarwar cewa masu amfani da WhatsApp daga ranar Talata za su iya amfani da akawun ɗinsu na WhatsApp a kan wayoyi har guda huɗu a lokaci guda.
Zuckerberg dai ya bayyana hakan ne a ranar Talata cikin wata sanarwar da ya wallafa a shafinsa na Facebook.
Kafin yanzu, masu amfani da WhatsApp ɗin za su iya shiga WhatsApp ɗin nasu ne ta waya ɗaya kawai.
Sama da mutane biliyan 2.24 ne ke amfani da WhatsApp kowane wata, wanda hakan ya sa ya zama ɗaya daga cikin shahararrun manhajojin wayar hannu na duniya.
