Real Madrid za ta karbi bakuncin Deportivo Alaves a wasan mako na 22 a gasar cin kofin La Liga da za su kara a Santiago Bernabeu a yammacin Lahadi.
Tuni kuma kocin Real, Santiago Solari ya bayyana sunayen ‘yan kwallo 20 da zai zabi wadanda za su fuskanci Alaves da wadan da za su yi zaman benci.
Alaves ce ta doke Madrid 1-0 a wasan farko a gasar La liga ta bana da suka fafata a ranar 6 ga watan Oktoban 2018.
Real tana ta uku a kan teburin gasar kakar nan da maki 39, ita kuwa Alaves tana da maki 32 a mataki na shida.
Madrid za ta buga wasanta na gaba da Barcelona a ranar 6 ga watan February 2019 a Camp Nou a karawar daf da karshe a Copa del Rey.
‘Yan kwallon Real Madrid 20:
Masu tsaron raga: Navas da Courtois da kuma Altube.
Masu tsaron baya: Ramos da Nacho da Marcelo da Odriozola da Reguilón da kuma Javi Sánchez.
Masu buga tsakiya: Modric da Casemiro da Llorente da Asensio da Isco da kuma Ceballos.
Masu cin kwallaye: Mariano da Benzema da Bale da Lucas Vázquez da kuma Vinicius Jr.