Yajin aikin ASUU: Malaman jami’a sun ce ba za su koma aiki ba sai an biya su albashinsu

Kungiyar malaman jami’a ta Najeriya ASUU, za ta kammala tattaunawar da take yi a wannan makon sannan ta sanar da gwamanti domin su sake zama.

ASUU na tattaunawa da sauran mambobinta kan sabon tayin da gwamnati ta yi musu bayan kammala tattaunwarsu a ranar 27 ga watan Nuwamba.

A tattaunawar da aka yi, gwamnati ta yarda ta biya malaman albashinsu amma sai sun fara komawa bakin aikinsu – abin da malaman suka ce sun ƙi wayon, babu kudi babu aiki.

Sun ce kada ma gwamnati ta za ci wani zai koma koyarwa matukar ba a biya su kuɗaɗensu ba.

Kungiyar na kukan cewa gwamnati ta riƙe albashin ‘ya’yanta saboda ta ƙi shiga cikin tsarin biyan albashin bai ɗaya da gwamnatin ta ƙaddamar.

“Yana da matukar muhimmanci a san cewa gwamnati ta rike wa mambobinmu alawus-alawus da kuma albashinsu tun daga watan Yuli 2020 har zuwa watan Oktoba 2020, kimanin watanni huɗu kenan,” in ji wani shugaban shiyya Olusiji Sowande da ya shaida wa BBC.

Uwar kungiyar ta ƙasa ta ce, gwamnati ta ɗibar musu wani wa’adi da za ta biya albashinsu tare da kuma bibiyar yadda za a biya kuma wa’adin zai kare ne a karshen wannan makon, sannan sai kungiyar ta dauki mataki na ƙarshe.

Sun ce matukar gwamnati ba ta biya albashinsu ba, ba za su koma makaranta ba, kuma sun daina amincewa da duk wani alkawari da gwamnatin za ta yi musu a nan gaba.

Wakilan bangarorin biyu sun haɗu sau bakwai domin samun mafita kan wannan yajin aiki, tare da bai wa dalibai damar koma wa karatu.

Kungiyar dai ta fara yajin aikin nata ne a watan Maris din wannan shekarar da nufin matsawa gwamnati ta samar da kayyyakin aiki a jami’o’i domin bai wa ɗalibai damar koyo da kuma gogayya da takwarorinsu na ko ina a duniya.

Suna kuma buƙatar a biya su alawus-alawus dinsu wanda suka yi aiki ba a biya su ba.

Sai kuma abu na uku wanda shi ne biyan albashinsu da gwamnati ta riƙe musu.

Yajin aikin da aka kwashe wata takwas ana yi, an cimma wasu daga cikin buƙatun daga karshen tattaunawar tasu kamar haka:

To mene ne ya yi wa ASUU saura?

Ɗaya daga cikin tayin da gwamnati ta yi wa ASUU da bai yi mata ɗaɗi ba, shi ne kudin da ta ce za ta bayar domin gyaran jami’o’i.

BBC ta gano cewa da yawan makarantu a Najeriya na koken ba su da kayan aiki yadda ya kamata.

Suna cewa ba su da ɗakunan karatu masu kyau, babu wuta wasu ma ba su da kujeru.

Sun ce dakunan kwanan ɗalibai sun lalace, da kudin da gwamnati ta bayar ba za a iya shawo kan wadannan matsaloli ba da jami’un Najeriya ke fama da su.

Abu na biyu, shi ne maganar albashinsu, wanda gwamnati ta ce su fara komawa bakin aiki kafin ta biyasu, sai dai sun ce a biya su sai su koma makaranta.

Wannan gwamnati ba da gaske take ba, ta kuma nuna wa ASUU ba za ta iya cika alkawarinta ba.

“Ngige na wajen da aka cimma yarjejeniya a 2017 haka ma a 2019 har zuwa yau, kuma bai cika jarjejeniyar ba dan haka ba za mu amince da su ba,” in ji wani shugaban ASUU.

Anya za a koma makaranta a wannan shekarar?

Har yanzu babu wani tabbaci kan buɗe jami’o’i a Najeriya.

Har yanzu dai akwai wasu matsalolin da ɓangarori biyun ba su cimma matsaya a kansu ba.

Tun daga shekarar 1978 da aka ƙirƙiri kungiyar ASUU, kungiyar ta je yajin aiki da dama domin samun biyan bukatunta.

Ta je yajin aiki a shkerun 1988 da 1992 da 2007 da 2008 da 2009 da 2013 da 2017 da 2019 da kuma 2020 tare da kawo ƙarshensu, amma a wannan karon sun ce ba za su koma ba har sai an biya musu bukatunsu.