Masu Garkuwa Sun Rage Kudin Fansa Ga ’Yan NYSC Da Suka Sace Zuwa N5m Kowanne

Masu garkuwa da wasu ’yan Najeriya da aka tafi da su domin fara aikin yi wa kasa hidima (NYSC) sun rage kudin fansar da suke nema daga N50m zuwa N5m ga kowane mutum.

Rahotanni sun ce hakan ya sa kudin fansar ’yan NYSC 20 da aka yi garkuwa da su ya koma N100m daga N1bn da masu garkuwar suka fara nema.

An yi garkuwa da wadanda abin ya shafa ne a ranar Alhamis, lokacin da suke tafiya daga Ibadan zuwa sansanonin NYSC da ke jihohin Abia da Akwa Ibom. Masu garkuwar sun tare motocin bas din da suke ciki a hanyar Owerri-Onitsha da ke Jihar Imo.

Iyalan wadanda aka sace sun nuna matukar damuwa kan halin da ’ya’yansu ke ciki, inda suka ce an fara cin zarafinsu tare da dukan wasu daga cikinsu.

Alhaja Alimot Akande, daya daga cikin iyayen wadanda aka sace, ta ce masu garkuwar sun rage kudin fansar zuwa N5m ga kowane mutum, amma har yanzu iyalan na cikin tashin hankali saboda tsoron lafiyar ’ya’yansu.

Ta kuma bukaci gwamnati da jami’an tsaro su gaggauta ceto wadanda aka sace, tana mai cewa masu garkuwar ba sa banbance tsakanin maza da mata wajen dukan wadanda suke tsare da su.

Iyalan wadanda aka sace sun kuma musanta rahotannin cewa jami’an tsaro sun ceto wasu fasinjoji 10, inda suka ce wasu daga cikin mutanen sun tsere ne da kansu bayan sun shiga cikin daji.

A gefe guda, jam’iyyun siyasa da wasu manyan mutane sun yi kira ga gwamnati da ta kara kaimi wajen ceto wadanda aka sace. African Democratic Congress (ADC) ta kuma yi kira da a dakatar da shirin NYSC na tsawon shekara guda domin sake tsara shi da kuma inganta matakan tsaro.

Jami’an tsaro sun ce suna ci gaba da kokarin gano inda ake tsare da wadanda aka sace. Rundunar ’yan sandan Imo ta ce ta gano yankin da ake kyautata zaton an boye wadanda aka sace, amma an dakatar da shiga yankin kai tsaye bayan samun bayanan sirri cewa ana iya samun na’urorin fashewa a wurin.

Sannan an tura manyan jami’an ’yan sanda domin jagorantar aikin ceto, yayin da gwamnatin Oyo ta ce tana aiki tare da gwamnatin Imo da jami’an tsaro domin ganin an kubutar da wadanda aka sace lafiya.