Darajar takardar kudin naira tayi faduwar da bata taba yi ba a kasuwar musayar kuɗi ta bayan fage inda ake canza dalar Amurka kan naira 1170.
Takardar kuɗin ta Najeriya ta yi kasa da N105 ko kuwa kaso 9.8 cikin ɗari idan aka kwatanta da yadda aka canza ta kan kuɗi N1065 a ranar Laraba.
A cewar wasu yan canjin kuɗi dake unguwar FESTAC a jihar Lagos darajar naira ta faɗi ne sakamakon ƙarancin dalar Amurka da ake fuskanta.
Yan kasuwar canjin kudaden sun ce suna sayan dalar Amurka akan naira N1155 su kuma su sayar kan 1170 ribar naira 15 kenan.
Amma kuma darajar ta naira ta yi sama kaɗan a kasuwar hada-hadar kuɗaɗe ta bankuna inda ake canza dalar Amurka ɗaya kan N790.68 mai makon naira 848 da aka rika sayar da kowace dala a ranar Talata.