Kungiyar kare hakkin dabbobi da Carrie Johnson ke jagoranta na shirin kai giwaye 13 nahiyar Afirka, domin farfado da tunaninsu, a wani mataki da aka yi ikirarin shi ne na farko a duniya.
Mai dakin firaiminista Boris Johnson, ita ce jami’ar yada labarai ta cibiyar kula da dabbobi ta The Aspinall Foundation, wadda ke kula da dabbobi gandun daji da ke Kent.
Shugaban Damian Aspinall ya ce an shaida musu za a saka su a keji na musamman sannan a sanya cikin jirgin sama zuwa kasar Kenya.
“Ba sai an tambaya ba wannan gagarumin aiki ne muka Æ™uduri aniyar aikawa,” kamar yadda ya shaida wa BBC.
Cikin wadanda za a yi tafiyar da su har da wasu kananan giwaye uku da ake ajiye su a gandun dajin da ke kusa da Canterbury.
Mista Aspinall ya ce: “Duk da farin cikin da suke ciki a nan Kent, ba nan ne ainihin inda suka tashi ba.”
Ya shaida wa sashen BBC da ke Kent cewa: “Giwaye ba sa walwala idan an turke su, da wuya su haihu, matansu na rayuwa ne a inda ake rayuwar zahiri.
Rabin giwayen da ake tsare da su, sun narka Æ™iba, suna fama da ciwon kafa, da cututtukan da suka shafi fata da kuma cutar damuwa. Amma muna bakin kokarinmu domin inganta rayuwarsu.”
Mista Aspinall ya amince aikin da za su yi mai matukar hadari ne, wanda shi ne irinsa na farko a duniya.
Ya kara da cewa: “Za mu yi kokarin tabbatar da an yi abin cikin kwanciyar hankali, yadda dabbobin ba za su wahala ba.”
Ya kara da cewa giwayen, masu nauyin tan 25, za su yi balaguron cikin katon keji da aka inganta shi da abubuwan da suke bukata domin taimakon gaggawa.
“Da zarar sun saba da shige da fice a cikin kejin shi kenan, domin manufar ita ce a sanya su cikin motocin a-kori-kura, daga nan kuma a zuba su a cikin jirgi sai Afirka.”
Mista Aspinall ya ce za a dauki shekara guda kafin giwayen su saba sosai.
A halin yanzu ana duba yiwuwar kai giwaye wurare biyu a Kenya domin gudanar da aikin, wanda kungiyar kare hakkin dabbobin ke cewa shi ne karon farko da ake kokarin sabuntawa wata dabba tunani da inganta walwala.
Ya kara da cewa: “Da zarar sun fita daga nan wurin, za su kasance cikin farin ciki, su yi ta walwala, ga kuma sauran giwaye da za su gani, duniya sabuwa.
“Idan bukatarmu ta biya, hakika za mu yi alfaharin mun yi wani abin kirki a duniya.”