An kori sojojin da suka kashe wani jami’in NDLEA a Neja

Rundunar sojin Najeriya ta gurfanar tare da korar wasu sojoji shida da ake zargi da hannu a mutuwar wani jami’in hukumar NDLEA, Kingsley Chimetalo, a gaban kotu.

An mika hudu daga cikin sojojin da abin ya shafa ga ‘yan sanda yayin da biyu suka gudu. 

Sojojin hudu da aka kora sun hada da Sani Munzani mai shekaru 24;  Abubakar Auwalu, 26;  Abubakar Sani, 23 da  Muazu Hassan, 22. 

An samu labarin cewa sojojin sun kashe jami’in hukumar ta NDLEA ne a watan Maris din shekarar 2024 a lokacin da suka far wa jami’an NDLEA da suka tsayar da su a lokacin da suke bincike a mahadar Ramat da ke Bida.

Faɗan ya kai ga daba wa Chimetalo wuka a bayansa.

An kai jami’in zuwa FMC Bida inda daga bisani aka tabbatar da mutuwarsa. 

Yayin da suke gudanar da bincike kan lamarin, jami’an ‘yan sandan da ke aiki da ‘A’ Division Bida sun gano bindigar jami’in a wani daji da ke kusa ba tare da gidan harsashi ba.