Iran ta bayyana cewa an ƙirƙiri wani tsarin sa ido na musamman domin tabbatar da tsagaita wuta a ƙasar Lebanon.
Mai magana da yawun tawagar Iran a tattaunawar da ake yi da Amurka, Esmail Baqaei, ne ya bayyana hakan yayin da ake ci gaba da zaman tattaunawa a Switzerland.
Baqaei ya ce an samar da tsarin ne tare da haɗin gwiwar ƙasashen Qatar da Pakistan masu shiga tsakani, domin tabbatar da kawo ƙarshen rikicin da ake fama da shi a Lebanon.
Ya bayyana cewa sabon tsarin zai taimaka wajen tabbatar da dorewar zaman lafiya a yankin tare da hana sake ɓarkewar rikici.
A cewarsa, yarjejeniyar ta tanadi dakatar da duk wani aikin soja a wurare daban-daban ciki har da Lebanon.
Haka kuma, Baqaei ya ce an samu ci gaba kan batun sakin wasu kadarorin Iran da Amurka ta ƙwace a baya, wanda ke cikin manyan batutuwan tattaunawar da ake yi.
An Kafa Tsarin Sa Ido Don Tabbatar Da Tsagaita Wuta A Lebanon — Iran
