Farashin Fetur Ya Kai N1,900 Kan Lita A Wasu Sassan Najeriya

Rahotanni sun nuna cewa farashin man fetur ya kai Naira 1,900 kan kowace lita a wasu sassan Najeriya, yayin da ake ci gaba da samun ƙarin farashi a kasuwannin man fetur.

Jaridar Vanguard ta ruwaito cewa farashin man ya ƙaru a gidajen mai da ke Legas, Fatakwal, Warri da Kalaba a ranar Juma’a, duk da matakin rage farashin da Kamfanin Man Fetur na Ƙasa (NNPC) ya ɗauka.

Wannan hauhawar farashin na ƙara jefa masu ababen hawa da sauran masu amfani da man fetur cikin matsin tattalin arziki, musamman sakamakon tasirin kuɗin sufuri da sauran kayayyaki da ayyuka.