An Ceto ’Yan NYSC 20 Da Aka Yi Garkuwa Da Su A Imo

An ceto ’yan takarar shiga shirin yi wa kasa hidima na NYSC 20 da aka yi garkuwa da su a Jihar Imo yayin da suke tafiya daga Jihar Oyo zuwa sansanin horas da ’yan NYSC da ke Abia.

An kubutar da su ne bayan shafe kwanaki bakwai da yin garkuwa da su a kan hanyar Owerri zuwa Onitsha, a yankin Umunoha na Jihar Imo.

Jami’in hulda da jama’a na rundunar ’yan sandan Najeriya, CSP Anietie Iniedu, ya tabbatar da sakin wadanda aka yi garkuwa da su a ranar Laraba, inda ya ce an kai su domin duba lafiyarsu da ba su kulawar da ta dace.

An ce jami’an ’yan sanda, sojoji, DSS da sauran hukumomin tsaro ne suka gudanar da aikin ceton, inda aka kubutar da wadanda aka yi garkuwa da su da misalin karfe 4:28 na yamma a kauyen Amakohia Ubi.

Sai dai kawo yanzu babu rahoton kama wadanda suka yi garkuwar, yayin da hukumomin tsaro suka ce suna ci gaba da kokarin gano wadanda suka shirya sace mutanen domin gurfanar da su a gaban kotu.

Gwamnan Jihar Imo, Hope Uzodimma, ya yabawa jami’an tsaron kan yadda suka gudanar da aikin cikin sirri da hadin gwiwa, yana mai cewa an dauki matakin ne domin kauce wa duk wani abu da zai iya kawo cikas ga aikin ceton.

Rahotanni sun ce ’yan NYSC 20 na cikin mutane 30 da ke tafiya daga Ibadan zuwa sansanin NYSC da ke Abia a cikin motocin bas biyu lokacin da ’yan bindiga suka yi musu kwanton bauna.

Masu garkuwar sun fara neman kudin fansa na N50m ga kowane mutum, kafin daga bisani su rage kudin zuwa N5m ga kowane wanda aka yi garkuwa da shi, wanda ya kai N100m gaba daya.