NNPCL Ta Rage Farashin Fetur Zuwa N1,405 A Wasu Sassan Abuja

Kamfanin Nigerian National Petroleum Company Limited (NNPCL) ya rage farashin man fetur a wasu daga cikin gidajen mansa da ke Abuja.

Binciken kasuwa ya nuna cewa wasu gidajen man NNPCL da ke Gwarimpa, Kubwa da sauran sassan babban birnin tarayya sun rage farashin litar fetur daga N1,430 zuwa N1,405.

Sai dai gidajen man NNPCL da ke Kubwa Expressway, Air Junction da Wuse Zones 4 da 5 sun ci gaba da sayar da litar man a kan N1,395.

Wannan ya sa farashin fetur a gidajen man NNPCL ya bambanta da N10 kan kowace lita, bisa ga inda gidan man yake.

A halin yanzu, wasu gidajen man MRS, Ranoil, AA Rano da Empire Energy da ke Abuja suna sayar da litar fetur kan farashin da ya kai tsakanin N1,395 da N1,430.

Rage farashin na NNPCL ya zo ne bayan matatar man Dangote ta rage farashin fetur daga wajen lodin mai da N25 a makon da ya gabata, inda ya koma N1,325 kan kowace lita.

Sai dai har yanzu mafi yawan gidajen man ba su sauke farashin ba, lamarin da ke ci gaba da janyo kiraye-kiraye daga ’yan Najeriya na neman a kara rage farashin fetur.

A lokacin rahoton, farashin danyen mai na WTI ya kai kusan dala 92 kan ganga guda, yayin da Brent crude ya kai kusan dala 104.