Fursuna guda ya mutu bayan da cutar kwalara ta barke a gidan gyaran hali dake Kano

Mutane biyu sun rasu a sakamakon barkewar cutar kwalara a gidan gyaran hali na Kurmawa da ke cikin birnin Kano.

Hukumar Kula da  Gidajen Gyaran Hali ta Najeriya (NCoS) ce ta tabbatar da hakan a cikin wata sanarwa da ta fitar ranar Asabar.

Mai magana da yawun hukumar na kasa, JN Osuji, ya ce gwaje-gwajen dakin binciken kimiyya da aka gudanar a ranar 23 ga Satumba sun tabbatar da barkewar cutar.

Ya bayyana cewa an fara gano cutar ne a ranar 17 ga Satumba bayan da wani fursuna ya fara nuna alamun amai da gudawa.

Hakan ya sa aka  kwantar da shi a cibiyar kula da lafiya ta gidan gyaran halin nan take, sannan aka fara aiwatar da matakan gaggawa na kiwon lafiya washegari.

Hukumar ta ce: “An tabbatar da barkewar cutar kwalara a gidan gyaran hali na Kurmawa  da ke Kano a ranar 23 ga Satumba ta hanyar tawagar likitocin hukumar tare da hadin gwiwar hukumomin kiwon lafiya na Jihar Kano.”

Ta kara da cewa: “An fara gano cutar ne a ranar 17 ga Satumba lokacin da wani fursuna ya zo yana  amai da gudawa, aka kwantar da shi nan take a cibiyar kula da lafiya ta gidan gyaran hali.”

Mutane biyu ne suka rasu  ɗaya a gidan  gyaran halin ɗayan kuma  a asibitin cututtuka masu yaduwa na Kano.

Shugaban hukumar na ƙasa, Sylvester Nwakuche, ya umarci ci gaba da bayar da kulawar likita, sa ido da  ɗaukar matakan kariya tare da kuma haɗa kai da gwamnatin Jihar Kano.

Nwakuche ya kuma tura tawagar manyan likitoci daga hedikwatar hukumar ya zuwa wurin domin ci gaba da sa ido.