Rundunar ƴan sandan jihar Kaduna ta ce jami’anta sun kama wani riƙaƙƙen mai safarar bindiga inda aka same shi da bindigogin AK-47 ƙirar gida guda 20.
A wata sanarwa ranar Juma’a mai magana da yawun rundunar ƴan sandan jihar Kaduna ya ce wanda aka kama ɗin mai suna, Bitrus Gyang ya fito ne daga Barikin Ladi a jihar Filato kuma an kama shi a Buruku dake ƙaramar hukumar Igabi ta jihar Kaduna.
Ya ce an kama Gyang ne a ranar Alhamis lokacin da jami’an tsaro suke gudanar da binciken ababen hawa da suka saba a gadar Buruku.
Mai magana da yawun rundunar ya bayyana cewa a lokacin da Gyang yake amsa tambayoyi ya faɗi cewa yana safarar bindigogi kuma wannan ne karo na uku.
Hassan ya ƙara da cewa kwamshinan ƴan sandan jihar, Ali Dabagi ya yabawa jami’an ƴan sandan kan sadaukarwar da suka nuna.
