Mataimakin shugaban kasa, Kashim Shettima, ya ce wadanda suka kai harin bam da jirage marasa matuka a Tudun Biri da ke karamar hukumar Igabi ta jihar Kaduna ba za su sha ba.
Shettima ya bayyana hakan ne a ranar Alhamis a lokacin da ya ziyarci Kaduna domin jajanta wa gwamnatin jihar kan harin bam da aka samu bisa kuskure wanda ya faru ranar Lahadi.
Mataimakin shugaban kasan ya kuma ziyarci asibitin kwararru na Barau Dikko da ke Kaduna, inda ya yi addu’ar Allah ya jikan wadanda suka rasa rayukansu a lokacin da lamarin ya faru.
A cewarsa, gwamnatin tarayya za ta kuma samar da dukkanin ababen more rayuwa da suka hada da makarantu da asibitoci.
