Rundunar ‘yan sandan jihar Kaduna ta tabbatar da cafke mutane 13 da ake zargi da hannu a kisan wani jami’in rundunar sojin ruwa, Laftanal Komodore M. Buba, a unguwar Kawo da ke cikin garin Kaduna.
Rahotanni sun bayyana cewa, marigayin wanda ke karatu a matsayin dalibi mai zurfi a Kwalejin Kwamando da Ma’aikatan Tsaro da ke Jaji, ya gamu da ajalinsa ne da safiyar Lahadi, da misalin karfe 5:20 na safe, a lokacin da wani da ake zargi da satar waya ya kai masa hari a kusa da gadar sama ta Kawo.
Mai magana da yawun rundunar ‘yan sandan jihar Kaduna, DSP Mansir Hassan, ya ce an kame wadanda ake zargin ne sakamakon wani samame da aka kai yankin bayan faruwar lamarin. An gano muggan makamai a hannun mutanen da aka kama.
A cewar wani kwararre kan sha’anin tsaro, Zagazola Makama, wanda ya wallafa bayani kan lamarin a shafinsa na sada zumunta a ranar Litinin, jami’in sojin ruwan ya tsaya ne domin sauya tayar motarsa da ta fashe lokacin da aka kai masa harin.
Rahotanni sun ce wanda ake zargin da kai harin ya zo wajen marigayin inda ya bukaci ya ba shi wayarsa, amma jami’in ya ki yarda da hakan tare da kalubalantar shi, wanda hakan ya sa aka soka masa wuka a kirji.
Sai dai kafin ya tsere daga wajen, wasu mazauna yankin suka cafke shi suka kuma yi masa dukan kawo wuka har lahira.
An garzaya da Laftanal Komodore Buba zuwa Asibitin Manaal, inda likitoci suka tabbatar da mutuwarsa tun kafin a fara masa jinya. Daga nan ne aka dauki gawarsa zuwa Asibitin Kwararru na Rundunar Sojin Kasa da ke Kaduna.
‘Yan sanda sun cafke mutane 13 bisa kisan wani jami’in rundunar sojin ruwa a Kaduna
