Hakkin mallakar hoto
Michigan State Police
Rundunar ‘yan sanda a Michigan ta saki hoton bidiyon fito na fiton tsakanin ‘yar sandan da wanda ake zargi
Wata ‘yar sanda a jihar Michigan da ke Amurka ta harbe wani mutum da ake zargi da dabawa wani kwastoma wuka a wani shago sakamakon wata takaddama kan takunkumin fuska.
‘Yan sanda sun ce lamarin ya samo asali ne a wani shago kusa da Lansing, wajen da wanda ake zargin – mai suna Sean Ruis – ya afkawa wani mutum mai shekara 77 da ya kalubalance shi saboda kin sa takunkumi.
Jami’an sun ce Ruis ya arce daga wajen da lamarin ya faru cikin wata mota.
Daga bisani kuma wata ‘yar sanda ta kama shi. Ta bude wuta lokacin da Ruis ya yi kokarin kai mata hari.
Rundunar ‘yan sanda a Michigan ta saki hoton bidiyon fito na fiton ranar Talata.
Hoton bidiyon ya nuna lokacin da motar ‘yan sanda ke tsayar da wata mota kuma direban motar da aka gano Ruis ne ya yi kan ‘yar sandan wadda ta harbe shi bayan wani dan sabani.
‘Yan sandan sun ce Ruis mai shekara 43 yana dauke da makami. An kai shi asibiti inda a nan ne aka tabbatar ya mutu.
Lamarin ya faru minti 30 bayan da ake zargin Ruis da cakawa wani kwastoma wuka a wani shago da ke Dimondale mai kusan nisan kilomita 10 daga kudanci.
Takaddamar dai ta faru ne lokacin da dan shekara 77 – da ke sanye da takunkumi – ya ke yi wa Ruis fada saboda kin saka takunkumi. Yanzu haka dattijon yana asibiti kuma yana samun sauki.
Ba wannan ne karon farko ba da ake samun irin wannan takaddama kan sa takunkumin fuska a Amurka.
Ko a makon da ya gabata, an tuhumi wani mai gadi a Gardena da ke kudu da Los Angeles da kisa bayan ya harbi wani kwastoma da ya shiga wani shago ba tare da saka takunkumi ba.
