Gwamnan jihar Gombe, Muhammad Inuwa Yahaya ya bayyana cewa shugaban kasa, Bola Ahmad Tinubu da kuma gwamnonin fadin kasarnan na cigaba da kokari matuka wajen fitar da yan Najeriya daga halin matsin tattalin arzikin da suke ciki.
Gwamnan ya kara da cewa cin alwashin da shugaban kasa Tinubu ya yi na samar da ingantaccen shugabanci zai taimaka wajen habaka yanayin tattalin arzikin da ake ciki nan bada jimawa.
Gwamnan ya bayyana haka ne a wurin kaddamar da rabon tallafin kayan abinci kashi na biyu a karamar hukumar Gombe da aka yi a fadar sarkin Gombe.
Ya bayyana cewa fadaɗa shirin da kuma cigaba da samar da tallafin anyi shi ne domin rage radadin cire tallafin man fetur.
Ya ce shirin ana sa ran zai samar da tallafi ga mutane matalauta dubu casa’in.
