Gwamnatin jihar Kaduna ta ce sojojin Najeriya sun dauki alhakin jefa bam a Tudun Biri da ke karamar hukumar Igabi a jihar Kaduna wanda ya yi sanadin mutuwar mutane akalla 30 a ranar Lahadi.
Jaridar PUNCH ta ruwaito cewa an kashe mutane da dama a kauyen Tudun Biri da ke karamar hukumar Igabi a jihar Kaduna bayan da wani jirgin soji ya jefa bam a yayin da ake gudanar da bukukuwan Mauludi.
A kalla mazauna garin 30 ne suka mutu a lamarin wanda ya faru da misalin karfe tara na daren Lahadi.
Tun da farko dai rundunar sojin saman Najeriya ta musanta alhakin kai harin.
