Shugaban Rundunar Sojan Sama Air Marshal Hasan Abubakar, ya gana da iyalai da wadanda harin bazata ya rutsa da su a ranar 24 ga Janairu, 2023, kusa da Rukubi a karamar hukumar Doma ta Jihar Nasarawa.
Daraktan hulda da jama’a da yada labarai na rundunar sojojin saman Najeriya NAF, AVM Edward Gabkwet ne ya bayyana hakan a ranar Lahadi a Abuja.
A taron da aka yi a Lafiya a ranar 26 ga watan Janairu, hukumar sojin ta nuna nadamar faruwar lamarin, inda ta ce rahotannin da suka shigo sun nuna cewa akwai yiwuwar an kashe fararen hula da ba su ji ba ba su gani ba bisa kuskure a yayin gudanar da aikin.
