Asalin hoton, Reuters
Saudiyya ta sanar da za ta kyale mazauna ƙasar su gudanar da ayyukan ibada na Umrah bayan ta dakatar da komai na tsawon watanni.
Hukumomin ƙasar sun ce daga baya za su kyale maniyyata dag ƙasashen waje su shiga ƙasar domin gudanar da ibadar wadda ta ke da muhimmanci ga Musulmin duniya, sai dai za ta ƙayyade yawan maniyyatan da yawan ƙasashen da za ta bari su shiga ƙasar.
Maniyatta da ke cikin Saudiyya na iya yin Umrah daga ranar 4 ga watan Oktoba, inda maniyattan da ke ƙasashen ƙetare kuwa sai sun jira zuwa ranar 1 ga watan Nuwamba kafin su sami izinin shiga ƙasar.
Ma’aikatar Aikin Hajji ta Saudiyya ta kuma bayyana cewa idan annobar korona ta gushe, za ta kyale dubban maniyatta daga ko’ina a duniya su ci gaba da ziyartar biranen Makkah da Madin domin gudanar da ibadunsu.
Musulmi na iya yin ibadar Umrah a duk lokacin da suka so, ba kamar aikin Hajji ba da ake iya yi sau É—aya kawai a kowace shekara.
Miliyoyin Musulmi daga sassan duniya kan tafi Saudiyya a kowace shekara domin sauke wannan muhimmiyar ibada da ke ta biyu ga aikin na Hajji a daraja.
Tun dai a watan Yulin bana hukumomin Saudiyya suka ɗauki matakai domin daƙile bazuwar annobar korona, A bana mutum 10,00 ne kawai suka yi aikin Hajji a maimakon kimanin miliyan biyu.
