Hakkin mallakar hoto
Getty Images

Wayne Rooney zai fuskanci tsohuwar kungiyarsa, Manchester United a wasan zagaye na biyar a FA Cup.

Kungiyar Rooney ta yi nasarar doke Northampton a wasa na biyu a zagaye na biyar a FA Cup.

Mai rike da kofi Manchester City za ta ziyarci Sheffield Wednesday.

Chelsea za ta karbi bakuncin Liverpool wadda ta fitar da Shrewbury a wasa na biyu da suka sake, Arsenal ta ziyarci Portsmouth.

Dukkan wasanni takwas za a yi sune a tsakiyar mako wato 3 zuwa biyar ga watan Maris.

Rooney, ya koma Derby mai buga gasar Championship a matsayin koci kuma dan wasa a watan Janairu daga DC United.

Mai shekara 34, ya buga wa United wasa 559 ya kuma ci kwallo 253.

Ya kuma lashe Champions League da Europa League da FA Cup tun bayan da ya koma Old Trafford da taka leda daga Everton a 2004 kan fam miliyan 27.

Tun bayan da ya bar Old Trafford sau biyu yana fuskantar United, bayan da ya koma Everton, amma dukkan karawar rashin nasara suka yi a kakar 2017/18.